کرونا ویروس؛ که احتیاط ونکړئ ځان او افغانستان به له سخت ګواښ سره مخ کړئ/ بریالی ویاړ

comments 0

د کرونا ویروس زموږ او ستاسو د کور مخې ته ولاړ دی، که احتیاط ونکړو ځان، کورنۍ، ټولنه او ټول هېواد به مو له داسې ستر ناورین سره مخ شي، چې کابو کول به یې له امکان وتلې خبره وي، تاسې باید د روغتیا پالانو هغه لارښوونې چې د کرونا ویروس د مخنیوي لپاره یې کړي دي، کلکې عملي کړئ.
د دغه وژونکې ویروس پر وړاندې مبارزه د خلکو او حکومت ګډ مسؤلیت دی، حکومت او خلک غیر له همکاری او ګډ کار پرته نه شي کولای د دغه ویروس د خپروي مخه ونیسي، نو بناً لازمه ده چې ګډ کار وکړو او بحرانونو ځپلی افغانستان له دې خطرناکې وبا وژغورو.
د دغه ویروس پر وړاندې مبارزه یواځې او یواځې د روغتیا پالانو او د هېواد د عامې روغتیا وزارت لخوا وړاندیز شوي وقایوي تدابیر دي.
دا باید هېڅ له پامه ونه غورځول شي، چې دا ویروس به په چټکۍ خپور نشي دا اوس هم تازه شمېر ښايي چې تر دا مهاله کرونا ویروس د افغانستان ۳۰ ولایتونو ته غځېدلی چې تر ټولو زیاتې ۳۲۴مثبتې پېښې په هرات، ۲۸۴په کابل او۱۰۸په کندهار ولایت کې ثبت شوي دي.
په افغانستان کې د کرونا ویروس له امله ۳۰ تنه مړه شوي دي.
دا یواځې افغانستان ندی، چې د کرونا ویروس له جدي ګواښ سره مخ دی، بلکې د دنیا ستر قدرت مند هېوادونه چې کافي ډېر امکانات هم لري یاد ویروس سخت وځپل.
دغه ویروس د نړۍ په شاوخوا ۱۸۵ هېوادونو او سیمو کې خپور دی چې تر دې دمه پرې څه باندې ۲.۱ میلیون انسانان اخته شويدي.
په امریکا کې د جانز هاپکنز پوهنتون وايي چې دغه ویروس د امریکا په وخت د جمعې د ورځې اپریل ۱۷(وري۲۷) تر سهار پورې په ټولې نړۍ کې څه باندې ۱۴۶زره کسان مړه کړي دي چې امریکا ټر ټولو ډېر تلفات لري.
کرونا په امریکا کې ۳۳۲۸۶ کسان مړه کړي‌ او څه باندې ۶۷۰زره نور پرې اخته دي. تر ټولو ډېر کسان په نیویارک کې مړه شوي چې شمېر یې ۱۱۴۷۷ ته رسیږي.
له امریکا وروسته ایټالیا دویم هېواد دی چې د کرونا له کبله په کې تر دې دمه ۲۲۱۷۰ تنه مړه شوي او نژدې ۱۶۹زره نور پرې اخته دي. امریکا په نړۍ او ایټالیا په اروپا کې دا مهال دکرونا ویروس مرکزونه بلل کیږي.
په هسپانیا کې بیا د کرونا له کبله ۱۹۱۳۵ تنه مړه شوي او شاوخوا ۱۸۵زره نور پرې ککړ دي.
فرانسه په نړۍ کې څلورم هېواد دی چې کرونا په کې ډېر ۱۷۹۴۱ کسان مړه کړي او ۱۴۷زره نور پرې اخته دي.
په برتانیا کې هم د کرونا تلفات ورځ په ورځ زیاتیږي. دغلته یې تر دې دمه ۱۳۷۵۹ کسان مړه کړي او څه باندې ۱۰۴زره نور پرې اخته دي. د برتانیا صدراعظم بوریس جانسن هم په دغه ویروس اخته دی او اوس کور کې دی.
بلجیم کې بیا ۵۱۶۳ کسان مړه شوي او شاوخوا ۳۶زره نور پرې اخته دي.
ایران د نړۍ اوم هېواد دی چې کرونا په کې تر دې دمه ۴۸۶۹ کسان مړه کړي او نژدې ۸۸زره نور پرې اخته دي. ایران د کرونا له کبله تر دې دمه په سیمه کې تر ټولو ډېر تلفات لري.
چین چې دغه ویروس په کې په لومړي ځل خپور شو وايي چې د کرونا له کبله په کې ۴۶۳۶ کسان مړه شوي ‌او تر ۸۳زره نور پرې اخته دي. خو راپورونه وايي‌ چې ښايي په چین کې تر هغه زیات کسان مړه شوي‌ وو چې حکومت یې اعلانوي.
په جرمني کې بیا شاوخوا ۴۱۰۰ تنه مړي‌ شوي ‌او څه باندې ۱۳۸زره نور پرې اخته دي.
او هالنډ تر دې دمه په نړۍ کې لسم هېواد کې چې کرونا په کې تر نورو ډېر۳۳۲۷ کسان مړه کړي دي‌. دغلته څه باندې ۲۹زره نور کسان په دغه ویروس اخته دي.
دا معلومات شېبه په شېبه او ورځ په ورځ بدلېدونکي دي. د کرونا ویروس په لومړي ځل د ۲۰۱۹ د ډسمبر په میاشت کې د چین د هوبي ایالت د ووهان په ښار کې خپور شوی.
یو ځل بیا هم پدې ټینګار کوم، چې د دغه ویروس پر وړاندې یواځېنۍ د مبارزې لاره د روغتیا د نړیوال سازمان، د روغتیا وزارت او په ټوله کې د ډاکټرانو او روغتیاپالانو وقایوي لارښوونې دي، چې باید په کلکه عملي شي، تر څو ځان، کورنۍ، ټولنه او افغانستان وژغورو.

Comments