ننګرهار کې د هېواد په کچه د کبانو د دانې تولید کارخونه پرانيستل شوه

comments 0

هندوکش ـ ننګرهار: د ننګرهار د کرنې، اوبولګولو او مالدارۍ ریاست وایي، چې د لومړي ځل لپاره په دې ولایت کې د حبیب حسام شرکت په نوښت، د هېواد په کچه د څه باندې يو ميلیون امريکايي ډالرو په پانګونې د کبانو د دانې توليدي کارخونې په فعاليت پيل وکړ، چې په يو ساعت کې د شل ټنه دانې د تولید ظرفيت لري او په دې سره به د کبانو روزونکو د خوراکې په برخه کې ستونزې هوارې شي.
په دې اړه جوړه شوې غونډه کې د ننګرهار مرستیال والي پوهنوال ببرک میاخېل وویل، چې په ننګرهار کې د کبانو روزونکو د دانې په برخه کې خورا ډېرې ستونزې لري، خو ددی کار خونې په فعالېدو سره به د هغوی ستونزې هوارې شي.
میاخېل دا کار خونه د ددې سکټور د پیاوړتیا لپاره یو ستر ګام وباله او په خپله برخه کې د هر راز همکاریو ډاډ ورکړ.
مرستیال والي پر نورو پانګوالو غږ وکړ چې، د حبیب حسام شرکت په څېر دې په ننګرهار کې پانګونه وکړي ترڅو خلکو ته د کار زمینه برابره شي.
په همدې حال کې د ننګرهار د کرنې، اوبولګولو اومالدارۍ رییس انجنیر انعام الله صافی وویل، چې د چرګانو د سکټور دپیاوړتیا ترڅنګ دکبانو د سکټور پیاوړتیا د کرنې ریاست له لومړیتوبونو څخه دي او دې برخې ته به لا ډېر کار وکړو ترڅو پرځان بسیا شو.
د ننګرهار د کرنې رییس وویل، هېواد ته د کال زرګونه ټنه د کبانو غوښه له بهرنیو هېوادونو واردېږي، چې ورسره میلیونه ډالر له هېواده بهر ځي. دهغه په خبره په دې برخه کې پانګونه هېواد ځان بسیاینې په لور بیایي.
صافي وویل د کبانو د بچیو د تولېد په موخه یې د عبدالخېلو په فارم کې د کبانو د تکثیري فارم جوړولو چارې په چټکۍ سره روانې دي او کومې هیچرۍ، چې په ټپه ولاړې دې د هغو د فعالولو لپاره هم هڅې روانې دي.
انعام الله صافی وویل: «وړاندې تر دې د کرنې ریاست د خپلو همکارو پروژو په مرسته د حبیب حسام شرکت ته د چرګانو د دانې د ټسټ لپاره یو مجهر لابراتوار جوړ کړې وه او په راتلونکې کې به له دوی سره له نږدې کار کوو ترڅو د کبانو د داني د لامعیاري کولو لپاره هم لابراتوار جوړ کړي.»
دغه راز د حبیب حسام شرکت د دانې د برخې مسول ډاکتر داد محمد درمل وویل، چې حبیب حسام شرکت په درې برخو هیچرۍ یا یورځنیو چرګوړو تولید، د هګيو چرګانو روزنه او د دانې تولېد په برخه کې کار کوي، چې له نېکه مرغه اوس یې د کبانو د دانې د تولید برخه هم فعاله کړه، چې ورسره به د هېواد په کچه د کبانو روزونکو یوشمېر ستونزې هوارې شي.
درمل وویل، چې یاده کار خونه په ساعت کې د ٢٠ مټریک ټنه دانې د تولید وړتیا لري، چې په کې به ٤٠ تنو ته مستقیم او تر ډېرو کسانو ته په غیر مستقیمه توګه د کار زمینې هم برابرې شي.
فرهاد شهراني

Comments