ملګرو ملتونو خپله ۷۵ اویومه کلیزه ولمنځله

comments 0

هندوکش ـ کابل: دا د ملګرو ملتونو د تاسیس په ۷۵ کلن تاریخ کې لومړی ځل دی، چې د دې سازمان د ۱۹۳غړو هیوادونو مشران به د کرونا ویروس د وبا د خپریدو په وجه خپلې کلنۍ ویناوې د ثبت شویو ویدیوګانو له لارې واوروي.
د ملګرو ملتونو کلنۍ تاریخي عمومي غونډه د سه شنبې په ورځ سپتمبر ۲۲ (تلې۱) په نیویارک کې پرانیستل شوه.
د سه شنبې د ورځې غونډه به د ۱۹۴۰ لسیزې راهیسې د تاریخي رواج له مخې د برازیل د جمهور رئیس جایر بولسونارو په وینا پیل شي او بیا به د ملګرو ملتونو د مقر د کوربه هیواد د امریکا د متحده ایالاتو جمهور رئیس دونالد ټرمپ وینا خپره شي.
د نن ورځې نور مشهور ویناوال به د ترکیې جمهور رئیس رجب طیب اردوغان، د چین جمهور رئیس جي جینپینګ، د روسیې جمهور رئیس ولادیمیر پوتین او د فرانسې جمهور رئیس ایمانویل مکرون وي.
د ملګرو ملتونو د عمومي اسمبلۍ په تالار کې به د هر غړي هیواد په استازیتوب یواځې یو نماینده حضور ولري، چې ماسک به یې تړلی وي او د ثبت شوې ویدیو وینا به ګوري.
ملګري ملتونه خپله ۷۵ کلنه کلیزه پداسې حال کې لمانځي چې د امریکا د جانس هاپکینز پوهنتون د شمیرو له مخې د کرونا ویروس په نړۍ کې تر اوسه ۹۶۰۰۰۰ تنه مړه کړي او څه د پاسه ۳۱.۲ میلیونه کسان پرې اخته شوي دي.
د ملګرو ملتونو سازمان په ۱۹۴۵ کال کې د دوهمې نړیوالې جګړې د عواقبو په نتیجه کې رامنځ ته شو چې د بلې نړیوالې جګړې د رامنځ ته کیدو مخه ونیول شي.
د ملګرو ملتونو عمومي منشي انتونیو ګوتېرس وایي: «د دریمې نړیوالې جګړې چې زیات شمیر خلک ویره لري مخه نیول شوې ده.
په اوسني تاریخ کې هیڅکله هم ندي شوي چې دومره کلونه دې د عمده ځواکونو پوځ سره مخامخ نشي. دا یوه لویه لاسته راوړنه ده چې غړي هیوادونه کولی شي پرې وویاړي او مونږ ټول باید هڅه وکړو چې دغه حالت وساتو.
سپوږمۍ پوپلزۍ

Comments