ملي امنیت شورا: طالبانو یوه اونۍ کې ۳۰ افغان ملکي وګړي وژلي

comments 0

هندوکش ــ کابل: د افغانستان د ملي امنیت شورا وايي، وسله والو طالبانو په تیره یوه اونۍ کې په نهو ولایتونو کې۳۰ ملکي وګړي وژلي او دوه نور یې ټپیان کړي دي.
د ملي امنیت شورا ویاند جاوید فیصل نن یکشنبه اپرېل۱۲ (وري ۲۴) پر خپل ټوېټر لیکلي چې د یادو کسانو زیاته برخه د طالبانو لخوا د سړک غاړې ماینونو چاودنو کې وژل شوي دي.
ښاغلي فیصل همدارنګه زیاته کړې: “وسله وال طالبان باید اوربند وکړي، تر څو ملکي وګړو ته زیان ونه رسیږي او د سولې په اړه هڅې نتیجه ورکړي.”
پر همدې مهال په افغانستان کې د اروپايي ټولنې سفیر پییري مایدون له وسله والو طالبانو د ژر تر ژره اوربند پلي کېدو غوښتنه کړې ده او زیاته کړې ده چې ټولې هڅې باید له کرونا ویروس سره د مبارزې لپاره تر سره شي.
دا په داسې حال کې ده چې د افغانستان د بهرنیو چارو وزارت تېره پنجشنبه له کرونا سره د مبارزې په هدف له طالبانو څخه د اوربند ټینګېدو غوښتنه وکړه.
دغه وزارت په یوې اعلامیې کې له اسلامي هیوادونو او نړیوالې ټولنې څخه غوښتي و چې په افغانستان کې د جګړې د پای ته رسولو په برخه کې مرسته وکړي.
وسله والو طالبانو تر دا مهاله په هیواد کې د سر تاسري اوربند ټینګېدو په اړه د افغان حکومت او نورو بهرنیو نړیوالو بنسټونو د غوښتنې په اړه څه نه دي ویلي.
سپوږمۍ پوپلزۍ

Comments