له اروپايي ټولنې د حمدالله محب غوښتنه؛ طالبان دې بریدونه بند کړي

comments 0

هندوکش ــ کابل: د افغانستان د ملي امنیت سلاکار حمدالله محب وایي، د طالبانو بریدونه باید هر څومره ژر ودرول شي. ښاغلي محب دا خبره پرون سې شنبه (د سلواغې ۱۴مه) په کابل کې د افغانستان لپاره د اروپایي ټولنې له سفیر اندریس وان برانیټ سره په کتنه کې کړې.
د افغانستان د ملي امنیت شورا په یوه ټویټ کې لیکي چې په دې کتنه کې دواړو لورو د سولې په پروسه او په افغانستان کې د امن او ثبات په چارو کې د دې ټولنې د همکارۍ په اړه خبرې وکړې.
دغه راز د افغانستان لپاره د اروپایي ټولنې ځانګړي استازي رولانډ کوبیا هم په دې اړه چې په قطر کې د افغانستان د دولت او طالبانو ترمنځ د خبرو له پیلېدو سره سره شخړې نه دي کمې شوې، اندېښنه څرګنده کړې ده.
ښاغلي کوبیا په یوه ټویټ کې لیکلي، دوه کاله مخکې په افغانستان کې یوازې شخړې روانې وې او د سولې د خبرو څرک نه و، خو کله چې دغه خبرې پیل شوې، د افغانستان ښې راتلونکې ته د خلکو هیلې هم زیاتې شوې، خو د هغه په وینا اوس چې په دوحه کې خلکو د خبرو میز پریښی، افغانستان ته بېرته شخړې ورپاتې دي.
د دواړو اړخونو ترمنځ د خبرو بل پړاو چې د تېرې جنوري میاشتې په پنځمه په دوحه کې پیل شوی، په وروستیو کې په ټپه دریدلی دي.
د افغانستان د دولت مرکچیانو طالبان تورن کړي چې خبرې یې پریښي او سفرونو ته یې مخه کړې ده.
د طالبانو دوه پلاوي په وروستۍ اوونۍ کې تهران او مسکو ته تللې دي.
سپوږمۍ پوپلزۍ

Comments