لغمان کې ټرافيکې پېښې ۴ کسان وژلي

comments 0

هندوکش ــ لغمان: پرون مازیګر د کابل – جلال اباد پر لویه لاره په یوه ترافیکې پېښه کې لږ تر لږه 4 کسان وژل شوي او ۱۵ نور ټپیان شوي دي.
د لغمان د والي ویاند اسدالله دولتزي وویل چې پېښه مازیګر درې نیمې بجې ددې ولایت د قرغیو ولسوالۍ کې د دوو مسافروړونکو موټرو د ټکر له کبله رامنځ ته شوې.
هغه زیاته کړه: “د قرغیو ولسوالۍ اړوند د اوریا خېلو پله ته څېرمه سیمه کې دوو مارسیډیز ډوله موټرو په ټکر کې ۴ کسان شهیدان شوي او د ۱۲ماشومانو په ګډون ۱۵ کسه ټپیان دي، په مړو کې دوه میرمنې او دوه نارینه شامل دي.”
د لغمان د والي د ویاند په وینا ټپیان نږدې روغتیايي مرکزونو ته رسول شوي، چې ډېر یې له لومړنۍ درملنې وروسته رخصت شوي خو څلور ټپیان چې ټپونه یې ژور وو د جلال اباد حوضوي روغتون ته لېږدول شوي.
د امنیتي پېښو تر څنګ ټرافیکي پېښې په افغانستان کې د ګڼو خلکو ژوند ګواښي چې په دې هېواد کې خراب سړکونه، د موټر چلونکیو تیز سرعت، بې پروايي او د ټرافیکي قوانینو نه رعایتول یې مهم سببونه دي.
فرهاد شهراني

Comments