طالبان تر خپل فعالیت لاندې ټولو سیمو کې د چاودنو مسوول دي/ سید عبدالله پاچا

comments 0

د جمعې په ورځ د غزني ګیلان ولسوالۍ کې طالبانو یو زرنج موټر سایکل چې له چاودیدونکو توکو یې ډک کړی و، په هغو مراسمو برید کړی چې د قران کریم د ختم لپاره جوړ شوي و.
دا زرنج موټر سایکل د طالبانو له لوري چمتو شوي و، یا دا چې طالبانو غوښتل کوم بل ځآی چاودنه ورکړي همدلته یې چاودنه کړې او یا دا چې دا بم چمتو شوی و چې همدې ځای کې پرې عام خلک ووژني.
له طالبانو دا تمه هم کیدلی شي چې دا یې په قصدي ډول کړی دی، ځکه طالبان او نورو ترهګرې ډلې یواځې غواړي تاوتریخوالی وکړي، شور جوړ کړي او زیاته وینه توی کړي، د دې وینې تویدنې په بدل کې طالبانو جنګي قومندانانو ته د بهرنیو هېوادونو استخبارات پيسې ورکوي.
جګړه چې اوس په کاروبار بدله شوې، هر ډله د خپل کار لپاره ګمارل شوې، ځینې به عام خلک وژني، ځینې به هدفي وژني کوي، ځینې به خلک ترور کوي، ځینې به عامه ځایونو کې چاودنې کوي، ځینې ماین خښوي او ځینې نور به عامه تاسیسات ورانوي، سړک او پل ته به بم ږدي.
دا کاروبار ، هر یو یې خپل قیمت لري او د طالبانو د وسله والو او جنګي قومندانانو په کې ښه ساعت تېر دی، د هرې چاودنې او د هر قتل قیمت مالوم دی او طالبان یې په بدل کې نغدې پيسې او وسلې او تجهیزات ترلاسه کوي.
د غزني د ګیلان ولسوالۍ چاودنه لومړنۍ نه ده، نه به وروستۍ وي، د اتلس کلنې جګړې په دوام طالبانو تر دې ډير جنایتونه او وحشتونه کړي دي، د ځینو مسوولیت طالبانو منلی او د ځینو یې نه دی منلی.
دا په دې پورې اړه نه لري چې طالبان د جګړې او چاودنو مسوولیت اخلي او یا یې نه اخلي، خو طالبان مجبور دي چې تاوتریخوالی وکړي.
تاسو دوه کاله وړاندې د طالبانو ټویټر یا ویب سایټ ته سر ورښکاره کړئ، هر ښار او سیمه کې به څوک چا مړ کړ، مسوولیت به یې دوی منه، خو اوس چې مخامخ جګړې وکړې، هم مسوولیت یې نه مني.
لامل دا دی چې طالبانو له نړیوالو سره ژمنه کړې چې تاوتریخوالی کموي او د سولې خبرې کوي، خو د خپلو بادارنو څخه مجبوریت لري چې د هغوی په خوښه تاوتریخوالي ته دوام ورکړي.
طالبانو خپله اعتراف کړی چې افغانستان کې هیڅ ترهګره ډله نشته او هر ځای دوی فعالیت کوي او ورانکارې کړنې کوي چې دوی ورته د جهاد نوم ورکوي.
طالبان د هرې چاودنې او په هره جګړه کې د هر ډول وینې تویدنې مسوول دي، له دوی به د افغانانو د وینې تویدنې پوښتنه کیږي او دا ورځ به رارسیږي.

Comments