د طالبانو له جګړو د بې ځایه شویو خلک وضعیت سیدعبدالله پاچا

comments 0

تازه د کندز په امام صاحب او خان اباد ولسوالیو کې طالبانو سختې جګړې پيل کړي چې له کبله یې سلګونه کورنۍ د کورنو پريښودو ته اړ شوي دي.
طالبان چې د خلکو له کورونو د سنګر کار اخلي، ډير کله د جګړې قربانیان ملکي وګړي وي او ملکي وګړي اړ کیږي چې کورونه طالبانو ته پریږدي.
د کندز د امام صاحب ولسوالۍ یو قومي مشر خبرې مې له رسنیو سره واوریدې چې نږدې هر کور او هر باغ کې طالبانو مورچې جوړې کړي او له دې ځایه پر افغان ځواکونو بریدونه کوي چې مقابل لوري او د طالبانو ډزو کې ملکي وګړي قرباني دي.
دا قومي مشر وایي، د طالبانو جګړې د ټولو خلکو د ژوند ارام اخیستی او شپه او ورځ ناارامنه او د اولادونو د خوندیتوب په غم کې وي.
د دې سیمې ډيری نارینه، ښځینه او ان ماشومان په رواني ناروغي اخته شوي، ځکه هلته هره ورځ طالبان په بد شکلونو سره ګرځي او هره ورځ ډزې کوي.
د دې سیمې زیات شمېر کورنیو ډک کورونه پريښې او یواځې سر یې خوندي ځای ته رسولی چې اوس په بد وضعیت کې ژوند کوي.
د طالبانو له نورو ولسوالیو چې طالبان پکې جګړې کوي، پخوا خلک د کندز ښار او ان کابل ته کډه شوي او سخت ژوند لري.
اوس چې یو ځل بیا طالبانو جګړې پيل کړي او د دې جګړې رهبري د پآکستان له استخباراتي کسانو سره ده، پلان یې دا دی چې خلک کورونو کې تنګ کړي او له سیمو یې وباسي.
دې سیمو کې خلک فصلونو ته پراته وي چې فصلونه به یې څو افغانۍ وکړي او بیا به پرې ژمی تیر کړي، خو اوس داسې ښکاري چې له دې خلکو فصلونه پاتې او راتلونکی ژمی له لوږې سره مخ دي.
که څه هم افغان دولت او خیریه بنسټونو له دې کورنیو سره لومړنۍ مرستې کړي، خو دا مرستې کفایت نه کوي او لا ډيرو مرستو ته اړتیا لري.
ما لپاره جالبه وه چې هغه ورځ طالبانو میدان وردګ ولایت کې سیلاب ځپلو سره مرستې کولې، خو کندز کې خلک له کورونو وباسي او د مرستي اخیستو لپاره یې محتاجه کوي.
جګړه چې نه وي، هیڅوک مجبور نه دي چې مرستې ته کیني، خو چې جګړه وي، نږدې ۷۰ سلنه افغانان د فقر تر کرښې لاندې ژوند کوي.
دا نه لومړی او نه وروستی ځل دی چې د طالبانو له جګړو خلک بې ځایه کیږي، طالبان په قصدي ډول باندې کلیو کې جګړه کوي چې خلک په ژوند کې تنګ کړي.
دا د پاکستان د استخباراتو پالیسي ده چې خلک باید سیمو کې نه وي، که وي، باید له دوی سره هر ډول همکاري ولري او که همکاري نه کوي، بیا یې په قصدي ډول له کور باسي، کور څخه یې سنګر جوړوي او د ځمکې حاصلات یې د غنیمت په توګه خوري.
طالب د دې وطن او افغانانو لپاره د سرطان دانه ده او تر څو چې دا دانه وي، تر هغې به افغانان ځوریږي او وطن به پرمختګونه نه کوي.

Comments