د ایراني پولیسو لخوا هریرود سیند ته د غورځول شویو افغانانو د موندلو عملیات پیل شول

comments 0

هندوکش ــ هرات: افغان چارواکو په هرات ولایت کې د هغو کسانو د موندلو لپاره عملیات پیل کړي دي چې ویل کېږي ایراني پوځیانو هریرود سیند ته غورځولي دي.
که څه هم ایراني چارواکو دا ادعاوې رد کړي خو د افغانستان د بهرنیو چارو سرپرست وزیر حنیف اتمر وویل چې په دې اړه به هراړخیز تحقیقات وشي.
د دې پېښې د قربانیانو دقیقه شمیره تراوسه نه ده معلومه شوې.
د جمهوري ریاست د چارو د ادارې یوه چارواکي ویلي چې د لومړنیو څېړنو له مخې لږترلږه اویا کسان چې غوښتل یې له هرات څخه د ایران خاورې ته ننوځي، د ایران د سرحدي ځواکونو له خوا وهل شوي او بیا هریرود ته اچول شوي دي.
د هرات حوزوي روغتون رییس عارف جلالي وايي، پنځه مړي دې روغتون ته رسېدلي چې له دې ډلې څلور کسان په اوبو کې د ډوبېدو له کبله مړه شوي دي.
د هرات د ولایتي شورا رییس احمد کرخي بیا ویلي چې دولس کسان په دې توانیدلي چې ځانونه په لامبو وژغوري او په ګلران ولسوالي کې اوه مړي موندل شوي دي.
امیر حسین سلجوقي

Comments