بهرنیو چارو وزارت: د اوکرایني الوتکې د پېښې د ځواب ویلو په اړه له نورو هېوادونو سره د یوې نړیوالې ډلې پر جوړیدو سلا شوي

comments 0

هندوکش ــ کابل: د افغانستان د بهرنیو چارو وزارت وايي، له یو شمېر هېوادونو سره یې تهران ته نژدې د نسکورې شوې اوکراینۍ الوتکې د پېښې په اړه د همغږۍ او د قربانیانو کورنیو ته د ځواب ویلو په هدف د یوې نړیوالې ډلې پر جوړیدو هوکړه کړې.
دغه وزارت په یوې خبرپاڼې کې ویلي، د بهرنیو چارو سرپرست وزیر ادریس زمان د پېښې تړاو د کاناډا او یو شمېر نورو هېوادونو چې وګړي یې په قربانیانو کې شامل دي له بهرنیو چارو وزیرانو سره ټیلفوني خبرې کړي دي.
د ولسمشر محمد اشرف غني ویاند صدیق صدیقي نن پر خپل ټویټر لیکلي، د رالوېدلې الوتکې د قربانیانو ۱۳ تنه افغانان دي. وړاندې دغه شمېره لس تنه اعلان شوې وه.
که څه هم ځینو غربي کارپوهانو لا له وړاندې د دغې الوتکې د ویشتل کېدو خبره کړې وه، خو ایران تر څو ورځې انکار وروسته نن ومنله چې ددوی ځواکونو په تېروتنې راغورځولې ده.
سپوږمۍ پوپلزۍ

Comments