انتقاد شدید وزیر دفاع روسیه از خروج عجولانه نیروهای خارجی از افغانستان

comments 0

هندوکش – کابل: سرگئی شویگو، وزیر دفاع روسیه چهارشنبه ۶ ، اسد،  در دیدار با شیرعلی میرزو، همتای تاجیکستانی خود خروج نیروهای خارجی به‌ویژه نیروهای آمریکایی از افغانستان را عجولانه خواند و گفت این اقدام شتاب‌زده اوضاع در افغانستان را به‌سرعت وخیم کرده است.

اسپوتنیک گزارش داده است که سرگئی شویگو در دیدار با وزیر دفاع تاجیکستان گفته است: «امروز، کار مشترک برای خنثی سازی تهدیدات از خاک همسایه‌گان افغانستان مورد توجه قرار گرفته است. وخامت سریع اوضاع در افغانستان که با خروج عجولانه امریکا رقم خورد نیاز به اقدامات مناسب دارد که این کار در حال انجام است.»

در همین حال، در این دیدار وزیران دفاع روسیه و تاجیکستان در مورد وضعیت امنیتی در مرز افغانستان و تاجیکستان و اقدامات مشترک برای رفع تهدیدهای مرتبط با جنگ در افغانستان گفت‌وگو کرده‌اند.

به گزارش اسپوتنیک، روسیه در تاجیکستان یک پایگاه نظامی ایجاد کرده است و به شدت نگران بدتر شدن وضعیت در افغانستان است.

بر اساس اطلاعات نشر شده قرار است که روسیه، تاجیکستان و ازبیکستان ماه آینده در مرز میان تاجیکستان و افغانستان مانور نظامی مشترک اجرا کنند.

گفتنی است که روسیه برای تقویت نیروی نظامی تاجیکستان، به این کشور سلاح‌های پیشرفته فرستاده است.

Comments