د پاکستان پخوانی وزیراعظم یوسف رضا ګېلاني په کورونا اخته شوی

comments 0

5 Views

هندوکش ــ پاکستان: د پاکستان پخوانی وزيراعظم او د پاکستان پپلز ګوند مخکښ سید يوسف رضا ګېلاني په کورونا وايرس اخته شوی دی.
د نوموړي زوی قاسم ګېلاني د جون پر ۱۳مه پر ټويټر پاڼه وليکل چې د پلار د کورونا ټېسټ يې مثبت راغلی دی.
هغه د خپل پلار په کورونا وايرس د اخته کېدو تور پر حکومت او د احتساب قامي ادارې نېب پورې کړی دی.
یوسف رضا ګېلاني د جون پر ۱۱ مه نېټه په راولپنډۍ کې په يوه مقدمه کې د احتساب عدالت ته حاضر شو.
قاسم ګېلاني ويلي، پلار يې جج ته خواست کړی وو چې په داسې حال کې د پارلېمان نور غړي هم په کووډ-۱۹ ناروغۍ اخته شوي دي نو بايد هغه په شخصي توګه عدالت ته له حاضرېدو مستثنی کړي.
تر دې وړاندې د پنجاب صوبې یو شمېر نور مهم سیاسي مشران په کورونا وایرس اخته شوي دي.
په دې کې د اپوزيشن او د مسلم ليګ نواز مشر شهباز شريف، د دې هېواد پخوانی وزيراعظم او د مسلم ليګ نواز يو بل لوړ پوړی مشر شاهد خاقان عباسي، د ريلوې پخوانی وزير سعد رفيق او د ريلوې اوسنی وزير شيخ رشيد احمد هم شامل دي.
په پاکستان کې کورونا وایرس تر اوسه تر ټولو زیات پنجاب صوبه ځپلې ده.
هلته د جون تر ۱۴مې د کورونا وهلیو شمېر ۵۲۶۰۱ دی او ۹۶۹ کسان یې وژلي هم دي.
دادا وزیري

Share this page to Telegram

Comments