د عراق وزيراعظم عادل عبد المهدي وايي استعفا ورکوي

comments 0

5 Views

هندوکش ــ عراق: دا له هغه وروسته ده چې په عراق کې د حکومت ضد په شاوخوا دوه مياشتنیو مظاهرو کې څه باندې ۴۰۰ کسان وژل شوي دي.
وزیراعظم عادل عبدالمهدي د نومبر پر ۲۹مه په يو بيان کې وويل چې هغه به خپله استعفا له پارلېمان سره جمع کړي چې پارلمان بيا يو نوی حکومت وټاکي.
۷۷ کلن عادل عبدالمهدي يوازې يو کال مخکې د وزيراعظمۍ څوکۍ سمبال کړې وه. نوموړي دا نه دي ويلي چې استعفا به کله ورکوي.
تر دې وړاندې د عراق ستر مذهبي عالمايت الله علي السيستاني د مظاهره چيانو پرضد د طاقت د استعمال غندنه وکړه او د پارلېمان پر غړو يې غږ وکړ چې د موجوده حکومتي کابینې له ملاتړه لاس واخلي.
نوموړي پر مظاهره چيانو هم غږ وکړ چې د تشدد او وحشتي توب فعاليتونه رد کړي.
دا له هغه وروسته ده چې د رپورټونو له مخې د نومبر په ۲۸ مه څه باندې ۴۰ او د نومبر پر ۲۹مه لږ تر لږه ۱۵ کسان د مظاهره چيانو او امنيتي سرتيرو ترمنځ په نښتو کې وژل شوي دي.
مظاهره چيان له حکومته د روزګارونو او ښو ولسي خدماتو غوښتنه کوي او وايي چې اداري فساد دې ختم شي.
فضل احمد الکوزی

Share this page to Telegram

Comments