د افغانستان ټولنیزې رسنۍ او د پاکستان نفوذ / بریالی ویاړ

comments 0

1 Views

خواله رسنۍ په ځانګړي ډول فیسبوک په افغانستان کې ډير زیات کارول کیږي او د مالوماتو له مخې شاوخوا یو میلیون افغانان فیسبوک کاروي.
فیسبوک په افغانستان کې د خبرونو او تحلیلونو په سرچینه بدل شوی دی، ډيرو سیمو کې چې خلک د یوې موضوع په اړه بحث کوي، د فیسبوک حواله ورکوي چې داسې خبر پکې نشر شوی دی.
همدې حساسیت او باور ته په کتو د پاکستان استخباراتي ادارې نفوذي کسان فیسبوک ته دننه کړي، دا کسان د افغانانو په نومونو دي او د افغانستان په وضعیت کړکیچ باندې پاروونکي خبرونه خپروي او تحلیلونه کوي.
د لیکلو او تحلیلونو تر څنګ ځانګړي ویډیوګانې جوړیږي او عکسونه فوټوشاپ کیږي چې پکې ځوانان سخت دریځۍ ته هڅوي او د افغانستان نظام پکې د شریعت خلاف نظام معرفي کوي.
د مالومات له مخې، فیسبوک ادارې په دویم ځل پاکستان کې سلګونه د فیسبوک اکاونټونه، پاڼې او ګروپونه تړلي چې مستعار و او قومي، ژبني او مذهبي تفرقو ته یې لمن وهله.
تر دې وړاندې هم د فیسبوک ادارې پاکستان کې پر پاڼه او اکاونټونو باندې عملیات کړي و چې زرګونه پاڼې او اکاونټونه یې له منځه وړي و.
د پآکستان استخبارات د افغانستان د خواله رسنیو لپاره ځانګړې بودجه او مستقله اداره لري چې هره ورځ تودو موضوعاتو کې داسې موضوعات راپورته کوي چې د اختلافاتو او جنجالونو لامل ګرځي.
افغانان چې تراوسه یې ډير ځوانان دوست او دښمن، ښه او بد، استخباراتي خبرونه او باوري خبرونو ترمنځ تفکیک نه شي کولی، دا ډول موضوعات ژر اخلي او بیا یې په خپلو فیسبوکونو هم خپروي.
د افغانستان تر څنګ د پاکستان استخبارات په خپله خاوره کې د پښتنو پرضد هم همدا ډول تبلیغات کوي چې پکې پښتانه خپل منځي جنجالونو ته هڅوي او سخت دریځۍ ته یې کش کوي.
د پاکستان استخبارات د کشمیر په اړه ځانګړې ویډیوګانې او فوټوشاپ عکسونه خواله رسنیو کې لاس په لاس کوي او بیا ځوانان هڅوي چې د کشمیر په جګړه کې رضاکار ډول باندې برخه واخلي.
دا د پاکستان لپاره ګټه کوي چې د کشمیر پروړاندې عام خلک وجنګوي او پوځ یې ترشا د ملاتړ لپاره ولاړ وي، پاکستان هیڅکله د هند پر خاوره او پوځ باندې برید نه شي کولی، یواځې دا چې عام خلک د جهاد په نوم د هند پروړاندې وجنګوي.
دغه راز د پاکستان استخباراتي ادارې د پښتون غورځنګ د مشرانو او نورو پښتو نومونو باندې ټویټر کې اکاونټونه جوړ کړي او د دوی د خپلمنځي اختلافاتو لپاره ترې ګټه پورته کوي.
دغه راز د پاکستان بله هڅه په خواله رسنیو کې دا ده چې افغانستان کې کله قومي، کله مذهبي، کله سمتي او کله ژبني موضوعات راپورته کړي او یو کړکیچ رامنځ ته کړي.
له نیکه مرغه اوس زموږ استخباراتي شبکې او فعال ځوانان په دې موضوعاتو خبر دي او ډير کله دا ډول موضوعات په وخت دفع کیږي او اجازه نه ورکول کیږي چې د خلکو اذهان مغشوش کړي.

Share this page to Telegram

Comments