حکومت: په تېره یوه میاشت کې وسلوالو طالبانو ۱۸۰ ملکیان وژلي

comments 0

34 Views

هندوکش ـ کابل: د کورنیو چارو وزارت وايي، چې وسلوالو طالبانو په تیرو ۲۸ ورځو کې څه باندې ۱۱۶۰ یرغلیز بریدونه کړي چې په کې ملکي وګړو ته درنه مرګ ‌ژوبله اوښتې ده.
د دغه وزارت ویاند طارق ارین د چهارشنبې به ورځ اکتوبر ۲۱ (تلې ۳۰) رسنیو ته په یو استول شوې ویډیو کلیپ کې ویلي، چې د طالبانو په دغو بریدونو کې ۵۵۵ ملکیانو ته مرګ‌ ژوبله اوښتې ده.
هغه زیاته کړه، چې له دې شمېرې ۱۸۰ تنه ملکي وګړي وژل شوي او ۳۷۵ نور ټپیان شوي دي.
د کورنیو چارو وزارت د معلوماتو په اساس د طالبانو په دغو بریدونو کې د ماین۱۷۰ چاودنې او ۱۰ ځانمرګي بریدونه شامل دي.
دغه وزارت د طالبانو دا بریدونه “نه بخښونکی او جنګي جنایت” بللی او ټینګار یې کړی چې “افغان نظامیان به په ټول قوت سره د طالبانو او د هغوی د همکارانو” دغو بریدونو ته ځواب ووايي.
ښاغلي ارین زیاته کړې، چې افغان ځواکونو د طالبانو د یرغلیزو بریدونو په ځواب کې د دغې ډلې ۸۴۰ جنګیالي وژلي، ۳۸۵ تنه یې ټپیان کړي او ۴۰ نور یې ژوندي نیولي.
په ورته وخت کې د افغانستان دفاع وزارت ویلي، چې په تیره یوه شپه او ورځ کې افغان امنیتي او دفاعي ځواکونو د فعالې دفاع په چوکاټ کې په ۲۶ ولایتونو کې د طالبانو بریدونه په شا تمبولي دي.
له دغه وزارت څخه په خپره شوې اعلامیه کې راغلي: “په تیرو ۲۴ ساعتونو کې ۱۱۶ طالبان هغه مهال ووژل شول او ۳۹ نور ټپیان شول چې د افغان ځواکونو پر پوستو یې بریدونه وکړل”.
د افغانستان د دفاع وزارت د اعلامیې په اساس دغه بریدونه په ننګرهار، کنړ، لغمان، نورستان، کاپیسا، کابل، میدان وردګ، غزني، لوګر، پکتیا، پکتیکا، کندهار، ارزګان، هرات، فراه، غور، بادغیس، فاریاب، جوزجان، سرپل، سمنګان، بلخ، هلمند، نیمروز، کندز او تخار ولایتونو کې شوي دي.
وسلوالو طالبانو تراوسه په دې اړه غبرګون نه دی ښودلی.
سپوږمۍ پوپلزۍ

Share this page to Telegram

Comments