اروپایي ټولنې افغانستان سره د مرستو ژمنې وکړې

comments 0

0 Views

هندوکش – سویس: د جینوا ناستې په څنده کې تیر ورځ اروپايي ټولنې له افغانستان سره ۴۷۴ ملیون یورو مرستې ډاد ورکړ.
دا په داسې حال کې ده چې پرون د افغانستان په اړه د جینیوا نړیوال دوه ورځینی کنفرانس د ولسمشر محمد اشرف غني په وینا پرانیستل شو.
راپورونه وايي چې اروپايي کمیسیون د دولت جوړولو، د عامه سیکتور د اصلاحاتو، روغتیا، عدالت، انتخاباتو او دغه راز د مهاجرت او بې ځایه کېدو په برخو کې له افغانستان سره د مرستې لپاره د ۴۷۴ ملیون یورو پکېج اعلان کړی.
د یاد کمیسیون د نړیوالې همکارۍ او پرمختګ کمیشنر نیفین میمیکا دا اعلان د افغانستان په اړه د جینیوا په کنفرانس کې اعلان کړ او د افغانستان د ولسمشر محمد اشرف غني په حضور کې یې د دغه هیواد له مالیې وزیر محمد همایون قیومي سره موافقه لاسلیک کړه.
ښاغلي میمیکا وویل«اروپايي اتحادیه له افغانستان او خلکو سره یې د دغه هیواد د ښې او قوي راتلونکې په جوړولو کې څنګ په څنګ ولاړه ده. د اروپايي اتحادیې د ۴۷۴ ملیون یورو نوې مرسته به د افغانستان د سولې او امنیت د ستونزو له کمولو سره لاس وکړي او د ښې او لا ثباتمنې ټولنې د جوړولو بنسټ به کښېږدي. د ګډو هلوځلو په وسیله موږ غواړو چې په مرستو د افغانستان اتکا کمه کړو او د ټولو افغانانو په ګټه پر ولسواکې حکومتولۍ پانګونه وکړو.»
د یادونې وړ ده چې مخکې ویل شوي و چې د جینیوا په کنفرانس کې به له افغانستان سره د نویو مرستو ژمنه نه کېږي بلکې افغانستان به د خپلو هغو ژمنو په اړه سپیناوی کوي چې په تېر نړیوال کنفرانس کې یې نړیوالې ټولنې ته ورکړې وې.
محمد امان دوران

Share this page to Telegram

Comments